შეავსე ფორმა
Logo

ინდექსები

ოქტომბერი 2022 | განწყობის დაღმასვლა
22 ნოემბერი 2022

მომხმარებელთა განწყობა გაუარესდა. მომხმარებელთა განწყობის ინდექსი სექტემბერში არსებული -24,1-დან ოქტომბერში -28,3 პუნქტამდე დაეცა (შემცირდა 4,2 ერთეულით). შემცირდა მომხმარებელთა განწყობის ორივე ქვე-ინდექსი – მოლოდინების და მიმდინარე მდგომარეობის, პირველი 3.3, ხოლო მეორე – 5.1 ერთეული პუნქტით.

ყველაზე შესამჩნევი ვარდნა დაფიქსირდა მომხმარებელთა განწყობაში არსებული ვითარების გათვალისწინებით მსხვილი საყოფაცხოვრებო ნივთების (მაგ.: სარეცხი მანქანების, კომპიუტერების, ღუმელების, მაცივრების და ა.შ.) შესყიდვებთან დაკავშირებით, (11-პუნქტიანი კლება). ეს მაჩვენებელი დადებით ტენდენციას ინარჩუნებდა ზაფხულის განმავლობაში, თუმცა ოქტომბერში ტენდენცია შეიცვალა. ასევე, 9 პუნქტით შემცირდა მომხმარებელთა მოლოდინი, რომ მსგავს შენაძენებს მომდევნო წლის განმავლობაში გააკეთებენ. შესაძლო ახსნა შეიძლება იყოს, რომ მომხმარებლებს ზაფხულთან შედარებით შეუმცირდათ მიმდინარე განკარგვადი შემოსავალი, როცა ვაჭრობისა და ტურიზმიდან მიღებული შემოსავლები ქევყანაში მაღალი იყო. განკარგვადი შემოსავლების შემცირებას ხელს უწყობს ორნიშნა ინფლაციაც, რადგან სურსათისა და საცხოვრებლის ხარჯები მნიშვნელოვნად გაიზარდა. წლიური ინფლაციის მაჩვენებლის თანახმად, ოქტომბერში სურსათისა და უალკოჰოლო სასმელების კატეგორიაში ფასები 15.8%-ით, საცხოვრებლის, წყლის, ელექტროენერგიის, გაზისა და სხვა ტიპის საწვავის შემთხვევაში კი 13.5%-ით გაიზარდა. დამატებით, მომხმარებელთა დანაზოგის გაკეთების შესაძლებლობის მაჩვენებელი 7 ერთეულით დაეცა. ეს მაჩვენებელი მნიშვნელოვანი დაღმავალი ტენდენციით ხასიათდება ივლისიდან მოყოლებული და ოქტომბრისთვის პანდემიის შემდგომ ყველაზე დაბალ ნიშნულამდე დავიდა. ამ შემთხვევაშიც, შესაძლო ახსნა შეიძლება იყოს ზემოთ განხილული საკითხები.

მომხმარებელთა განწყობა გაუარესდა როგორც თბილისის, ისე საქართველოს რეგიონების მაცხოვრებელთა შემთხვევაში. დედაქალაქში მცხოვრები მომხმარებლების შემთხვევაში ინდექსის ვარდნამ 4.1 პუნქტი შეადგინა, დანარჩენებისთვის კი – 4.5.

გრაფიკები: მომხმარებელთა პასუხები კითხვების მიხედვით

შეავსე ფორმა