2025 წლის აპრილში მომხმარებელთა განწყობის ინდექსი (CCI) კიდევ უფრო გაუმჯობესდა და -10.6 ინდექსის პუნქტს მიაღწია, რაც მომხმარებელთა განწყობის აღდგენაზე მიუთითებს. მარტთან შედარებით, ინდექსი 1.3 ინდექსის პუნქტით გაიზარდა, რის გამოც იანვრის დონესთან სხვაობა შემცირდა, თუმცა საერთო განწყობა უარყოფითი რჩება.

აპრილში ორივე ქვე-ინდექსი გაიზარდა, რაც აღქმებისა და მოლოდინების მცირე გაუმჯობესებას ასახავს. მიმდინარე მდგომარეობის აღქმის ინდექსი -15.2-მდე გაიზარდა, მარტთან შედარებით 1.7 ინდექსის პუნქტით გაუმჯობესდა, ხოლო მომავლის მიმართ მოლოდინების ინდექსი უფრო ზომიერად გაიზარდა -5.9 ინდექსის პუნქტამდე. მიუხედავად ამ გაუმჯობესებისა, მიმდინარე მდგომარეობის შეფასება მნიშვნელოვნად უფრო პესიმისტური რჩება, ვიდრე მომავლის მოლოდინები, რაც ადასტურებს, რომ შინამეურნეობები მუდმივად ღელავენ ყოველდღიურ ეკონომიკურ მდგომარეობაზე.

ინდიკატორების დონეზე, ინფლაცია კვლავ მთავარი გამოწვევაა, თუმცა გარკვეული შემსუბუქება მაინც შეინიშნება. განწყობა წარსული ინფლაციის მიმართ მცირედით გაუმჯობესდა -75 ინდექსის პუნქტამდე, რაც ინფლაციის წნეხის შემსუბუქებაზე მიუთითებს. ამავდროულად, ინფლაციის მოლოდინები მარტთან შედარებით გარკვეულწილად გაუარესდა და -20 ინდექსის პუნქტამდე დაეცა, რაც იმაზე მიუთითებს, რომ მიუხედავად იმისა, რომ მომხმარებლები კვლავ ელიან ფასების ზრდას, თუმცა უფრო ნელი ტემპით ვიდრე აქამდე.

ზოგადი ეკონომიკური მდგომარეობის შეფასებები აპრილში მნიშვნელოვნად გაუმჯობესდა. ბოლოდროინდელი ეკონომიკური მოვლენების აღქმა -6 ინდექსის პუნქტამდე გაიზარდა, ხოლო ქვეყნის ეკონომიკური სიტუაციის განვითარებაზე 7 ინდექსის პუნქტამდე აღდგა, რითაც წინა თვეებში დაფიქსირებული კლების ტენდენცია შეიცვალა. ეს მოვლენები მომხმარებლებში უფრო ხელსაყრელ მაკროეკონომიკურ პერსპექტივაზე მიუთითებს.

შინამეურნეობების ფინანსებსა და შრომის ბაზართან დაკავშირებული ინდიკატორებიც გაუმჯობესების ნიშნებს აჩვენებს. მიმდინარე პირადი ფინანსური მდგომარეობის შეფასება  დადებითი გახდა და 4 ინდექსის პუნქტი შეადგინა, ხოლო პირად ფინანსურ მდგომარეობაზე მოლოდინები 18 პუნქტამდე გაიზარდა, რაც შინამეურნეობების დონეზე მზარდ ოპტიმიზმზე მიუთითებს. უმუშევრობის მოლოდინები მცირედით უარყოფითი გახდა (-1 პუნქტი), რაც შრომის ბაზარზე მცირე შეშფოთებას ასახავს, თუმცა საერთო განწყობა შედარებით სტაბილური რჩება.

რაც შეეხება მოხმარებასა და დანაზოგებს, ამ მხრივ განწყობა ზომიერად გაუმჯობესდა. იმის შეფასება, არის თუ არა ახლა კარგი დრო მსხვილი შენაძენების გასაკეთებლად, -38 ინდექსის პუნქტამდე გაიზარდა, ხოლო მსხვილი შენაძენების განხორციელების შესახებ მოლოდინები დადებითი დარჩა 4 პუნქტზე, რაც იმაზე მიუთითებს, რომ განწყობა სამომავლო მოხმარების თანდათანობით აღდგენაზე მიუთითებს. ამის საპირისპიროდ, დანაზოგებთან დაკავშირებული ინდიკატორები კიდევ უფრო შესუსტდა: მიმდინარე დანაზოგის გაკეთების შეფასება 42 ინდექსის პუნქტამდე დაეცა, ხოლო მომავალი დანაზოგების მოლოდინები უარყოფითი დარჩა -44-ზე, რაც იმაზე მიუთითებს, რომ შინამეურნეობები სკეპტიკურად არიან განწყობილნი მომავალში დაზოგვასთან დაკავშირებით.

საერთო ჯამში, 2025 წლის აპრილის შედეგები მომხმარებელთა განწყობის გაუმჯობესებაზე მიუთითებს, რაც ზოგადი ეკონომიკური მდგომარეობისა და შინამეურნეობების ფინანსური პერსპექტივების უკეთესი შეფასებებით არის განპირობებული. მიუხედავად ამისა, მუდმივი ინფლაციური წნეხი და დანაზოგების მიმართ გაუარესებული შეხედულებები კვლავ უარყოფითად მოქმედებს საერთო განწყობის დონეზე, განსაკუთრებით მიმდინარე ეკონომიკური მდგომარეობის აღქმის თვალსაზრისით.