2025 წლის ოქტომბერში მომხმარებელთა განწყობის ინდექსი (CCI) -11.3 ინდექსის პუნქტამდე გაუმჯობესდა, რითაც სექტემბერში დაფიქსირებული მკვეთრი გაუარესება ნაწილობრივ აღდგა. წინა თვესთან შედარებით, ინდექსი 1.7 პუნქტით გაიზარდა, რაც მომხმარებელთა განწყობის ზომიერ გაუმჯობესებაზე მიუთითებს, თუმცა განწყობა გვიან გაზაფხულსა და ადრე ზაფხულში დაფიქსირებულ დონეებზე მნიშვნელოვნად დაბალი რჩება.

ოქტომბერში გაუმჯობესება ძირითადად მიმდინარე მდგომარეობის უკეთესი აღქმით იყო განპირობებული, ხოლო მომავლის მიმართ მოლოდინები უცვლელი დარჩა. მიმდინარე მდგომარეობის აღქმის ინდექსი -14.1-მდე გაიზარდა, სექტემბერთან შედარებით 3.4 ინდექსის პუნქტით გაუმჯობესდა, ხოლო მომავლის მიმართ მოლოდინების ინდექსი თითქმის სტაბილური დარჩა -8.5-ზე, მხოლოდ 0.1 ინდექსის პუნქტით, მცირე გაუარესებით. ეს ტენდენცია იმაზე მიუთითებს, რომ შინამეურნეობებმა უშუალო ეკონომიკური ზეწოლის გარკვეული შერბილება აღიქვეს, ხოლო მომავლის მიმართ გაურკვევლობა შენარჩუნდა.

ინდიკატორების დონეზე, ინფლაციასთან დაკავშირებული შეშფოთება კიდევ უფრო გაიზარდა, განსაკუთრებით მოლოდინების თვალსაზრისით. წარსული ინფლაციის აღქმა უკიდურესად დაბალი დარჩა -80 ინდექსის პუნქტზე, რაც ადასტურებს, რომ შინამეურნეობები კვლავ განიცდიან მაღალი ინფლაციის წნეხს. უფრო მნიშვნელოვანია, რომ ინფლაციის მოლოდინები მკვეთრად გაუარესდა -39 ინდექსის პუნქტამდე, რაც 2025 წელს დაფიქსირებული ყველაზე დაბალი მაჩვენებელია, რაც მომავალი ფასების დინამიკასთან დაკავშირებულ გაზრდილ შეშფოთებაზე მიუთითებს და ნეგატიური განწყობის მთავარ ფაქტორს წარმოადგენს.

ზოგადი ეკონომიკური მდგომარეობის შეფასებები ზომიერად გაუმჯობესდა. ბოლოდროინდელი ეკონომიკური მოვლენების აღქმა -5 ინდექსის პუნქტამდე გაიზარდა, ხოლო მოლოდინები ქვეყნის ეკონომიკური სიტუაციის განვითარებაზე 7-მდე გაიზარდა, რაც სექტემბრის კლების შემდეგ მაკროეკონომიკური პერსპექტივების მიმართ ოპტიმიზმის გაზრდზაზე მიუთითებს.

შინამეურნეობების ფინანსებთან და შრომის ბაზართან დაკავშირებული ინდიკატორები არაერთგვაროვან, მაგრამ ზოგადად გაუმჯობესებულ სიგნალებს აჩვენებს. პირადი ფინანსური მდგომარეობის ბოლოდროინდელი ცვლილებების შეფასებები 6 ინდექსის პუნქტამდე გაიზარდა, ხოლო პირადი ფინანსების სამომავლო მოლოდინები საგრძნობლად გაიზარდა 19-მდე და ზაფხულის დონეებს მიუახლოვდა. უმუშევრობის მოლოდინები -1 ინდექსის პუნქტამდე გაუმჯობესდა, რაც შრომის ბაზართან დაკავშირებული შეშფოთების მცირე შერბილებაზე მიუთითებს.

მოხმარების გადაწყვეტილებებთან დაკავშირებული განწყობა ოდნავ გაუარესდა. იმის შეფასება, არის თუ არა ახლა კარგი დრო მსხვილი შენაძენების გასაკეთებლად, -32 ინდექსის პუნქტამდე გაუარესდა, ხოლო მსხვილი შენაძენების გაკეთების მოლოდინები ზომიერად შემცირდა 10-მდე, რაც იმაზე მიუთითებს, რომ ფინანსური მდგომარეობის გაუმჯობესების მოლოდინების მიუხედავად, შინამეურნეობები მაინც სიფრთხილეს იჩენენ.

დაზოგვის ქცევასთან დაკავშირებული ინდიკატორები გაუმჯობესდა, მაგრამ მყიფე რჩება. იმის შეფასება, არის თუ არა ახლა კარგი დრო დანაზოგების გასაკეთებლად, 47 ინდექსის პუნქტამდე გაუმჯობესდა, ხოლო მოლოდინები მომავალში დაზოგვის გაკეთების მიმართ მკვეთრად უარყოფითი დარჩა -48-ზე, რაც ფასების მზარდი მოლოდინების პირობებში იმას ნიშნავს, რომ შინამეურნეობები სკეპტიკურად არიან განწყობილები მომავალში თანხების დაზოგვასთან დაკავშირებით. მიმდინარე ფინანსური მდგომარეობის შეფასებები -21 ინდექსის პუნქტამდე გაუმჯობესდა, რითაც სექტემბერში დაფიქსირებული მკვეთრი გაუარესება ნაწილობრივ შეიცვალა.

საერთო ჯამში, 2025 წლის ოქტომბრის შედეგები მომხმარებელთა განწყობის ნაწილობრივ და არათანაბარ გაუმჯობესებაზე მიუთითებს, რაც ძირითადად მიმდინარე ფინანსური მდგომარეობისა და შინამეურნეობების გაუმჯობესებული მოლოდინებით არის განპირობებული. თუმცა, მკვეთრად გაუარესებული ინფლაციის და დაზოგვის მოლოდინები კვლავ უარყოფითად მოქმედებს მომხმარებელთა განწყობაზე, რაც მის მყიფე და არასტაბილურ ხასიათზე უსვამს ხაზს.