2026 წლის თებერვალში მომხმარებელთა განწყობის ინდექსი (CCI) მკვეთრად დაეცა -14.0 ინდექსის პუნქტამდე, რაც იანვართან შედარებით მომხმარებელთა განწყობის მნიშვნელოვან გაუარესებას ასახავს. ინდექსი თვიურ ჭრილში 7.1 ინდექსის პუნქტით დაეცა, რითაც წლის დასაწყისში დაფიქსირებული გაუმჯობესება შეიცვალა და 2025 წლის დასაწყისის შემდეგ ყველაზე დაბალ დონეს მიაღწია.

კლება ძირითადად მიმდინარე მდგომარეობის აღქმის მკვეთრი გაუარესებით იყო განპირობებული, ხოლო მომავლის მიმართ მოლოდინები უფრო ზომიერად შესუსტდა. მიმდინარე მდგომარეობის აღქმის ინდექსი მნიშვნელოვნად შემცირდა და -23.9 ინდექსის პუნქტს მიაღწია, რაც იმას ნიშნავს, რომ იანვართან შედარებით 12.8 ინდექსის პუნქტით გაუარესდა. ამასთან, მომავლის მიმართ მოლოდინების ინდექსი უფრო მოკრძალებულად შემცირდა -4.1 ინდექსის პუნქტამდე (კლება 1.4 ინდექსის პუნქტი იყო). ეს განსხვავება იმაზე მიუთითებს, რომ მომავლის მიმართ განწყობის შემცირება ძირითადად მიმდინარე ეკონომიკური პირობების აღქმის გაუარესებით იყო გამოწვეული და არა მომავალზე ორიენტირებული მოლოდინების მნიშვნელოვანი ვარდნით.

ინდიკატორების დონეზე, შინამეურნეობების ფინანსური მდგომარეობის შეფასებები მნიშვნელოვნად შესუსტდა. პირადი ფინანსური მდგომარეობის ბოლოდროინდელი ცვლილებების შეფასება -3 ინდექსის პუნქტამდე დაეცა, ხოლო პირადი ფინანსების სამომავლო მოლოდინები უმნიშვნელოდ შემცირდა 12 ინდექსის პუნქტამდე, თუმცა მთლიანობაში დადებითი დარჩა. ამავდროულად, მიმდინარე ფინანსური მდგომარეობის შეფასება მკვეთრად გაუარესდა -37 ინდექსის პუნქტამდე – დაკვირვების პერიოდში ყველაზე სუსტი მაჩვენებელი, რაც შინამეურნეობების ფინანსურ მდგომარეობაზე მზარდ ზეწოლაზე მიუთითებს.

ზოგადი ეკონომიკური მდგომარეობის შეფასებებიც მნიშვნელოვნად გაუარესდა. ბოლოდროინდელი ეკონომიკური მოვლენების აღქმა -16 ინდექსის პუნქტამდე დაეცა, ხოლო მოლოდინები ქვეყნის ეკონომიკური განვითარებაზე 2 ინდექსის პუნქტამდე შემცირდა, რაც რესპონდენტებში მაკროეკონომიკური პერსპექტივების მიმართ ოპტიმიზმის შემცირებაზე მიუთითებს.

ინფლაციის წნეხი მომხმარებლებისთვის კვლავ მთავარ საზრუნავად რჩება. წარსული ინფლაციის აღქმა კვლავ მკვეთრად უარყოფითია და -81 ინდექსის პუნქტს შეადგენს, რაც იმას ნიშნავს, რომ შინამეურნეობები კვლავ ძლიერ საფასო ზეწოლას განიცდიან. ამავდროულად, ინფლაციური მოლოდინები კიდევ უფრო გაუმჯობესდა და -1 ინდექსის პუნქტს მიაღწია, რაც იმაზე მიუთითებს, რომ სამომავლო ფასების ზრდასთან დაკავშირებული შეშფოთება წინა თვეებთან შედარებით მნიშვნელოვნად შემსუბუქდა.

შრომის ბაზარსა და მოხმარების ქცევასთან დაკავშირებული ინდიკატორები არაერთგვაროვან დინამიკას ავლენენ. უმუშევრობასთან დაკავშირებული მოლოდინები გაუმჯობესდა -9 ინდექსის პუნქტამდე, რაც შრომის ბაზართან დაკავშირებული შეშფოთების შემცირებაზე მიუთითებს. თუმცა, იმის შეფასება, არის თუ არა ახლა მსხვილი შენაძენების გაკეთებისთვის კარგი დრო, მკვეთრად გაუარესდა -49 ინდექსის პუნქტამდე – დაკვირვების პერიოდში ყველაზე სუსტი მაჩვენებელი, რაც მოხმარების გადაწყვეტილებებთან დაკავშირებით გაზრდილ სიფრთხილეზე მიუთითებს. ამის საპირისპიროდ, მსხვილი შენაძენების გაკეთების მოლოდინები 21 ინდექსის პუნქტამდე გაუმჯობესდა, რაც მიმდინარე მოხმარებისა და მომავლის მიართ დამოკიდებულებას შორის განსხვავებას უსვამს ხაზს.

დანაზოგებთან დაკავშირებული ინდიკატორები მთლიანობაში შემცირდა. იმის შეფასება, არის თუ არა ახლა დანაზოგის გაკეთებისთვის კარგი დრო, 43 ინდექსის პუნქტამდე შემცირდა, ხოლო სამომავლო დანაზოგების მოლოდინები კიდევ უფრო გაუარესდა -51 ინდექსის პუნქტამდე, რაც შინამეურნეობების დანაზოგების შენარჩუნების უნართან დაკავშირებით მზარდ შეშფოთებას ასახავს.

საერთო ჯამში, 2026 წლის თებერვლის შედეგები მომხმარებელთა ნდობის მკვეთრ და ფართომასშტაბიან გაუარესებაზე მიუთითებს, რაც ძირითადად გამოწვეულია მიმდინარე ფინანსური მდგომარეობისა და ზოგადი ეკონომიკური გარემოს გაუარესებული შეფასებებით. მიუხედავად იმისა, რომ ზოგიერთი მომავალზე ორიენტირებული ინდიკატორი შედარებით მდგრადი რჩება, განსაკუთრებით ინფლაციის მოლოდინები და მომავალი მოხმარება, საერთო სურათი იმაზე მიუთითებს, რომ შინამეურნეობები არსებული ეკონომიკური მდგომარეობის მნიშვნელოვან გაუარესებას ელიან.