2022 წლის მსგავსად, COVID-19-ის პანდემიის შემდეგ, საქართველოს ეკონომიკა 2023 წელსაც აღდგენის პროცესში იყო. საქსტატის წინასწარი შეფასების თანახმად, რეალური მშპ-ის მაჩვენებელი კვლავ შედარებით სწრაფი ტემპით იზრდება და მან 2023 წელს 7,5% შეადგინა, რაც მნიშვნელოვნად აღემატება საქართველოს ეროვნული ბანკის მიერ 2023 წლის ოქტომბერში პროგნოზირებულ 6%-ს. 2023 წელს გლობალური ეკონომიკის აღდგენის პროცესი ნელი ტემპით მიმდინარეობდა, რაც გამოწვეული იყო მაღალი ინფლაციური წნეხითა და შეზღუდული ფინანსური გარემოთი, რასაც კიდევ უფრო ამძაფრებდა არსებული რთული გეოპოლიტიკური ვითარება. მიუხედავად იმისა, რომ მე-4 კვარტალში საგარეო მოთხოვნა შემცირდა და, შედეგად, საქართველოში შემცირდა ექსპორტიც, ეკონომიკური ზრდა კვლავ სტაბილური იყო. ეს, უმეტესწილად, ტურისტული საქმიანობის შედეგად მიღებული მნიშვნელოვანი შემოსავლითა და გაზრდილი შიდა მოთხოვნით იყო განპირობებული.
ლარი გამყარდა, შედეგად კი მიმდინარე ანგარიშის დეფიციტი მხოლოდ უმნიშვნელოდ გაიზარდა. ინფლაციის დონე კვლავ დაბალი იყო, რაც განპირობებული იყო საყოფაცხოვრებო საქონელზე არსებული შედარებით სტაბილური მსოფლიო ფასებითა და ქვეყნის მკაცრი მონეტარული პოლიტიკით. 2023 წელს საქართველოში ინფლაციის დონე მნიშვნელოვნად შემცირდა და წლის ბოლოს 0.4%-ს მიაღწია. შემცირება, უმეტესწილად, ინფლაციის იმპორტის კომპონენტით იყო განპირობებული. მკაცრი მონეტარული პოლიტიკის მიუხედავად, მაღალმა ერთობლივმა მოთხოვნამ საპირისპირო ზეგავლენა იქონია ადგილობრივ ფასებზე.
საბაზო სცენარის თანახმად, მოსალოდნელია, რომ ჭარბი მოთხოვნა სრულად ნორმალიზდება 2024 წლის განმავლობაში, მონეტარული პოლიტიკის განაკვეთი კი ეტაპობრივად შემცირდება. მოსალოდნელია, რომ ეს ხელს შეუწყობს ინფლაციის სტაბილიზაციას სამიზნე ნიშნულამდე საშუალოვადიან პერიოდში (სებ, იანვარი 2024).
02
ოქტომბერი
2024
საქსტატის წინასწარი შეფასების თანახმად, 2024 წლის მეორე კვარტალში საქართველოს ნომინალური მშპ 22,101.7 მლნ ლარს შეადგენდა, მშპ-ის ზრდის წლიური მაჩვენებელი 9.6%, ხოლო მშპ-ის დეფლატორი – 2.5% იყო. ეს ზრდა სხვადასხვა სექტორში დამატებული ღირებულების მნიშვნელოვანი ზრდით იყო განპირობებული: მასპინძლობასთან და კვებით სექტორთან დაკავშირებული საქმიანობა გაიზარდა 35.7%-ით, განათლება – 21.3%-ით, შინასამეურნეო საქმიანობა, როგორიცაა დამსაქმებლებისა და მწარმოებლების მიერ პირადი მოხმარებისათვის საქონლის წამოება და მომსახურებების გაწევა – 17.3%-ით, ტრანსპორტირება და სასაწყობო საქმიანობა – 16.1%-ით, საჯარო ადმინისტრირება და თავდაცვა, მათ შორის სოციალური უსაფრთხოება – 13.3%-ით, მშენებლობა – 13%-ით.
28
ივნისი
2024
საქსტატის წინასწარი შეფასების თანახმად, 2024 წლის პირველ კვარტალში საქართველოს ნომინალური მშპ 18,913.2 მილიონ ლარს შეადგენდა, რეალური მშპ-ის ზრდის წლიური მაჩვენებელი 8.4%, ხოლო მშპ-ის დეფლატორის ცვლილება 3.1% იყო.
29
დეკემბერი
2023
კოვიდ-19-ის პანდემიისა და რუსეთის უკრაინაში შეჭრის შედეგად არსებული მძიმე სიტუაცია ნელი, არათანაბარი ტემპით უმჯობესდება. მიუხედავად იმისა, რომ წლის დასაწყისში შეინიშნებოდა ეკონომიკური სტაბილურობა, რაც ეკონომიკის აღდგენით და ინფლაციის შესამცირებლად გაღებული ძალისხმევით გამოიხატა, სიხარული ჯერ მაინც ნაადრევია – ეკონომიკური აქტივობა ჯერ კიდევ არ დაბრუნებია პანდემიამდე არსებულ მაჩვენებელს, განსაკუთრებით, განვითარებადი ბაზრისა და ეკონომიკის მქონე ქვეყნებში, განსხვავება რეგიონებში დაფიქსირებულ მაჩვენებლებს შორის კი იზრდება.
23
ოქტომბერი
2023
2023 და 2024 წლებში მოსალოდნელია გლობალური ეკონომიკური ზრდის მაჩვენებლის 3,0%-მდე შემცირება 2022 წელს არსებული 3,5%-დან. საერთაშორისო სავალუტო ფონდის (სსფ) 2023 წლის აპრილის პროგნოზებთან შედარებით, 2023 წელს მოსალოდნელია ზრდის მაჩვენებლის 0,2 პროცენტული პუნქტით ზრდა, 2024 წლის პროგნოზი კი უცვლელია.
03
ივლისი
2023
გლობალური ეკონომიკის მდგომარეობა კვლავ არასტაბილურია. ეს განპირობებულია პანდემიით გამოწვეული ნეგატიური მოვლენებით, რუსეთის მიერ უკრაინაში შეჭრით, ინფლაციის მაღალი მაჩვენებლით და გამკაცრებული მონეტარული პოლიტიკით. მიუხედავად იმისა, რომ წლის დასაწყისში გლობალური ეკონომიკური მაჩვენებლები დამაკმაყოფილებელი იყო, ვითარების გაუარესება არის მოსალოდნელი.
