25 ივლისს თბილისში საერთაშორისო კონფერენცია გაიმართა, რომელიც საქართველოს სტატისტიკის ეროვნული სამსახურის (საქსტატი) 105 წლისა და გენდერული სტატისტიკის შეგროვების 25 წლის იუბილეს მიეძღვნა. ორდღიანი ღონისძიების მთავარი თემა გენდერული სტატისტიკის მეშვეობით ინკლუზიური განვითარების დაჩქარება იყო და საქსტატისა და გაეროს ქალთა ორგანიზაციის ორგანიზებით გაიმართა.

კონფერენციაში მონაწილეობა მიიღეს ევროკავშირის წევრი, კანდიდატი და აღმოსავლეთ პარტნიორობის (EaP) ქვეყნების, ცენტრალური აზიის ქვეყნების სტატისტიკის ოფისების ხელმძღვანელებმა და სხვადასხვა საერთაშორისო ორგანიზაციის მაღალი დონის წარმომადგენლებმა. ღონისძიების გახსნაში მონაწილეობა მიიღეს საქართველოს სამთავრობო უწყებების, არასამთავრობო ორგანიზაციების, აკადემიური ინსტიტუტებისა და საქართველოში არსებული საერთაშორისო ორგანიზაციების წარმომადგენლებმაც.

ISET-ის კვლევითი ინსტიტუტის წამყვანმა ეკონომისტმა, დავით კეშელავამ, კონფერენციაზე გენდერული თანასწორობის ინდექსის უახლესი მონაცემები წარმოადგინა. მან განიხილა ინდექსის მოტივაცია, მისი მეთოდოლოგია, ბოლო შედეგები, დინამიკა და დაფიქსირებული ცვლილებების მიზეზები.

მონაცემებმა აჩვენა, რომ სამხრეთ კავკასია საბაზისო ქვეყნებთან შედარებით ჩამორჩება ფულის, ძალაუფლების, დროისა და ჯანმრთელობის სფეროებში. მიუხედავად ამისა, რეგიონის ყველა ქვეყანამ აჩვენა მნიშვნელოვანი გაუმჯობესება 2000-იანი წლებიდან მოყოლებული და სტაბილურად მიუახლოვდა აღმოსავლეთ ევროპის ქვეყნების სტანდარტებს.

კონფერენციაზე ხაზი გაესვა გენდერული სტატისტიკის კრიტიკულ როლს ინკლუზიური განვითარების ხელშეწყობაში და იმას, თუ რამდენად მნიშვნელოვანია რეგიონში გენდერული თანასწორობის გაძლიერება.