შეჯამება

საქსტატის წინასწარი შეფასების მიხედვით, 2025 წლის მეორე კვარტალში საქართველოს ნომინალურმა მშპ-მა 25,347.0 მლნ ლარი შეადგინა, რეალური მშპ-ის წლიურმა ზრდამ – 7.3%, ხოლო მშპ-ის დეფლატორის ცვლილებამ – 4.8%. ერთ სულ მოსახლეზე გაანგარიშებულმა მშპ-მა 6,842 ლარი შეადგინა. ეკონომიკური გაფართოვება მეტწილად რამდენიმე სექტორის ძლიერმა ზრდამ განაპირობა. ზრდა სერვისების სექტორიების ლიდერობით განხორციელდა, ყველაზე მნიშვნელოვანი ზრდა შემდეგ სექტორებში დაფიქსირდა: ინფორმაცია და კომუნიკაცია (+37.1% წლიურად), განათლება (+28.9%), ხელოვნება და გართობა (+16.0%), ფინანსები და დაზღვევა (+11.8%), ჯანდაცვა (+14.3%), განთავსება და კვება (+8.4%). შემცირება დაფიქსირდა შემდეგ სექტორებში: ელექტროენერგია, გაზი, ორთქლისა და ჰაერის კონდიცირების მიწოდება (-7.0%), მშენებლობა (−2.6%) და სოფლის მეურნეობა (-2.5%). საქართველოს ეროვნული ბანკის პროგნოზით, 2025 წლისთვის რეალური მშპ-ის ზრდა 7.4%-ს შეადგენს, რაც აღემატება მსოფლიო ბანკის (7%) და საერთაშორისო სავალუტო ფონდის (7.2%) წლიური ზრდის პროგნოზებს.

2025 წლის მეორე კვარტალში ლარი ძირითადად სტაბილური იყო აშშ დოლართან მიმართებაში, რაც ხელს უწყობდა იმპორტირებული ინფლაციური წნეხის შეზღუდვას და სავალუტო ვალზე საბალანსო რისკების შერბილებას. ევროსა და სხვა სავაჭრო პარტნიორების ვალუტებთან, რომლებიც უფრო მეტად გამყარდნენ აშშ დოლართან მიმართებაში, ლარი ოდნავ გაუფასურდა. ნომინალური ეფექტური გაცვლითი კურსი ძირითადად უცვლელი დარჩა, ხოლო რეალური ეფექტური გაცვლითი კურსი განაგრძობდა წონასწორობისკენ მიახლოებას საქართველოს პარტნიორებთან შედარებით დაბალი ინფლაციის ფონზე. ამ დინამიკამ შეინარჩუნა გარე კონკურენტუნარიანობა, მიუხედავად იმისა, რომ პარტნიორი ქვეყნების ფასების დინამიკა პოტენციურ გადაცემის არხად ნარჩუნდებოდა. სავალუტო გარემოში არსებული ნდობა აისახა დეპოზიტების დოლარიზაციის განახლებულ შემცირებაში დაახლოებით 49.7%-მდე ივნისისთვის (ეროვნული ბანკი, ივლისი 2025).

2024 წლის მეორე კვარტლის მზარდ უმუშევრობასთან (13.7%) შედარებით, 2025 წლის მეორე კვარტალში უმუშევრობის დონე 14.3%-მდე გაიზარდა (საქსტატი). საშუალო წლიური სამუშაო ძალაში მონაწილეობაც 0.4 პროცენტული პუნქტით შემცირდა და 54.1%-ს მიაღწია. საქსტატის წინასწარი შეფასების მიხედვით, 2025 წლის პირველ კვარტალში, საშუალო ყოველთვიური ნომინალური ანაზღაურება 2,212 ლარს შეადგენდა.