2021 წლის 21 ოქტომბერს, ISET-ის კვლევითი ინსტიტუტის მკვლევარებმა, გიორგი პაპავამ და დავით კეშელავამ მონაწილეობა მიიღეს კვლევის „საქართველოს პოლიტიკური ლანდშაფტი: მრავალფეროვნება, პოზიციების თანაკვეთა და თავისუფალი სივრცეები“ პრეზენტაციაში, რომელსაც ფრიდრიხ ებერტის ფონდმა უმასპინძლა. კვლევა საქართველოს სააერჩევნო კომპასის მონაცემების საფუძველზე მომზადდა.

ISET-ის კვლევითი ინსტიტუტის მხრიდან კვლევის თანაავტორები გიორგი პაპავა და დავით კეშელავა იყვნენ. კვლევის სხვა ავტორები არიან ლევან კახიშვილი (საქართველოს პოლიტიკის ინსტიტუტი) და დავით სიჭინავა (CRRC საქართველო).

ღონისძიებაზე წარმოდგენილი კვლევა გვთავაზობს შემდეგ ძირითად მიგნებებს:

• ქართულ პოლიტიკურ კომპასზე პარტიათა უმეტესობა ან მემარცხენე და კულტურულად კონსერვატიულია, ან ლიბერალური და მემარჯვენე მიდრეკილების მქონე. ეს იმას ნიშნავს, რომ ორგანზომილებიან იდეოლოგიურ ველზე, რომელსაც წინამდებარე კვლევა ეყრდნობა, ორნაირი იდეოლოგიური ვაკუუმია შექმნილი - მემარცხენე-ლიბერალური და მემარჯვენე-კონსერვატიული. სხვა სიტყვებით რომ ვთქვათ: ამ ღირებულებების მქონე ამომრჩევლები ქართულ პოლიტიკაში არასათანადოდ არიან წარმოდგენილნი.
• საქართველოს ამომრჩეველთა უმრავლესობა მინიმალური ხელფასის რეგულირების მომხრეა, უპირატესობას ანიჭებს ნებაყოფლობით მონაწილეობას კუმულაციური საპენსიო სისტემაში, ეთანხმება უფრო მაღალი გადასახადების დაწესებას იმ ბიზნესებისთვის, რომელიც აბინძურებს გარემოს, და აქვს მკაფიო და ძლიერი პროდასავლური და პროევროკავშირული პრეფერენციები.
• კვლევის თანახმად, ერთიანი ნაციონალური მოძრაობის პოტენციური ამომრჩეველი უფრო ლიბერალური და ეკონომიკურად მემარცხენეა, თავად პარტია კი მხარს უჭერს მემარჯვენე ეკონომიკურ პოლიტიკას: ნაციონალური მოძრაობის ამომრჩეველთა 94.2%-ს უფრო მემარცხენე შეხედულებები აქვს, ვიდრე თავად პარტიას, ამომრჩეველთა 91.5%-ს უფრო კონსერვატიული იდეოლოგია აქვთ ვიდრე პარტიას. 2020 წლის არჩევნებში გამარჯვებული „ქართული ოცნებაც“ ყველაზე ახლოს არის „საშუალო“, ანუ მედიანურ ამომრჩეველთან. ამ ანგარიშში გამოყენებული მონაცემები არ ადასტურებს საქართველოში უკიდურესი პოლარიზაციის არსებობას. თუ გავითვალისწინებთ ორ უმსხვილეს პოლიტიკურ პარტიას – „ქართულ ოცნებასა“ და „ნაციონალურ მოძრაობას“ – მონაცემები აჩვენებს, რომ პოლიტიკის 30 საკითხიდან ნახევარზე ორივე პარტიეს ერთი და იგივე პოზიცია აქვს. ეს არ შეიძლება ჩაითვალოს უკიდურესი პოლიტიკური პოლარიზაციის ნიშნად. გარდა ამისა, ამომრჩეველთა პრეფერენციები არ მიუთითებს იმაზე, რომ არსებობს ორი გამოკვეთილი სოციალური ჯგუფი, რომელსაც ურთიერთგამომრიცხავი პრეფერენსები აქვს.

პროექტი ამერიკის შეერთებული შტატების საერთაშორისო განვითარების სააგენტოს, გერმანიის პოლიტიკური ფონდებისა და ნიდერლანდების სამეფოს მხარდაჭერით აღმოსავლეთ ევროპის მრავალპარტიული დემოკრატიის ცენტრმა (EECMD), ფრიდრიხ ებერტის ფონდმა, ფრიდრიხ ნაუმანის ფონდმა, ჰაინრიხ ბიოლის ფონდმა, კონრად ადენაუერის ფონდმა და საერთაშორისო რესპუბლიკურმა ინსტიტუტმა განახორციელეს. პროექტის მეთოდოლოგიურ გამართულობასა და საინფორმაციო უსაფრთხოებაზე პასუხისმგებელი იყო ამსტერდამის ვრიჟეს უნივერსიტეტის ბაზაზე არსებული კომპანია, Kieskompas, რომელიც საარჩევნო საკონსულტაციო აპლიკაციებზე მუშაობს.