აპრილი 2024 | ხაჭაპურის ინდექსი თვიურ ჭრილში ზედიზედ მეორე თვეა მცირდება

ინდექსები

30 აპრილი 2024

2024 აპრილში ერთი სტანდარტული იმერული ხაჭაპურის მომზადების ღირებულებამ 6.24 ლარი შეადგინა, რაც 4.0%-ით აღემატებოდა 2023 წლის აპრილის მაჩვენებელს. თუმცა თვიურ ჭრილში (2024 წლის მარტთან შედარებით) ხაჭაპურის ღირებულება 2.4%-ით შემცირდა.

საქართველოს ქალაქების მონაცემების შეფასებამ გვაჩვენა, რომ 2024 წლის აპრილში ინდექსი შემცირდა ბათუმში (-5.9%), ქუთაისსა (-4.9%) და თბილისში (-3.7%), თელავში კი გაიზარდა (+4%).

რაც შეეხება ინგრედიენტების ფასებს, აპრილში წლიური ფასები გაიზარდა ხაჭაპურის ყველა ინგრედიენტზე: კარაქი (+15.6%), საფუარი (+15.3%), რძე (+12.1%), კვერცხი (+3.2%), ყველი (+2.2%), ფქვილი (+0.4%). თუმცა თვიურ ჭრილში ინგრედიენტების უმეტესობის ფასები შემცირდა: ყველი (-4,1%), საფუარი (-1,2%), კვერცხი (-1,1%), რძე (-0,7%). გამონაკლისი აღმოჩნდა კარაქი (+1,1%) და ფქვილი (+0,7%). ფასების თვიური კლება ემთხვევა ახალი რძის წარმოების სეზონურ ტენდენციას, რომელიც ტრადიციულად პიკს ივნისსა და ივლისში აღწევს. გარდა ამისა, 18 მარტს დიდი მარხვის დაწყებამ შესაძლოა ხელი შეუწყო ყველსა და რძის პროდუქტებზე ფასების შემცირებას, რადგან დიდმარხვის პერიოდში ამ პროდუქტებზე მოთხოვნა, როგორც წესი, მცირდება.

თეგები: #ინდექსი, #ხაჭაპურის ინდექსი, #ფასები, #ინფლაცია,

ინდექსები

მსგავსი ინდექსები