თამარ სულუხია 2016-2019 წლებში მსოფლიო ბანკში მდგრადი განვითარებისა და ინფრასტრუქტურის თურქეთის პროგრამას ხელმძღვანელობდა. 2010-2015 წლებში იგი უკრაინის, ბელარუსისა და მოლდავეთის მდგრადი განვითარების პროგრამას ხელმძღვანელობდა, კიევში. თამარმა მსოფლიო ბანკის სამხრეთ კავკასიის რეგიონულ ოფისში 2004 წელს დაიწყო მუშაობა ინფრასტრუქტურის უფროსი სპეციალისტის პოზიციაზე. მანამდე იგი საქართველოს ინფრასტრუქტურისა და მდგრადი განვითარების მინისტრი (2004 წ.) და საქართველოს საზოგადოებრივ საქმეთა ინსტიტუტის ადგილობრივი მმართველობის ცენტრის ხელმძღვანელი (2002-2004 წწ) იყო. 2001-2002 წწ-ში თამარი ფულბრაიტის მკვლევარის სტატუსით ჯორჯ ვაშინგტონის უნივერსიტეტში სწავლობდა, 1997-2001 წწ-ში კი USAID-ის კავკასიის ოფისში განვითარების თანაშემწის პოზიციაზე მუშაობდა. თამარს აქვს არაერთი წამყვანი ქართული და საერთაშორისო არასამთავრობო ორგანიზაციის საბჭოს წევრობის გამოცდილება. ის იყო საქართველოს ურბანული განვითარების ქალთა ასოციაციის პრეზიდენტიც. 2002-2009 წწ-ში იგი ურბანული პოლიტიკისა და მმართველობის კურსს კითხულობდა საქართველოს საზოგადოებრივ საქმეთა ინსტიტუტში. იგი ურბანული დაგეგმარებისა და მმართველობის თემაზე არაერთი პუბლიკაციის ავტორია. 1997 წელს თამარმა საქართველოს ტექნიკური უნივერსიტეტის ურბანული დაგეგმარების დოქტორის ხარისხი მოიპოვა.